Жартылай ауыр салмақта қолғап түйістіретін қазақстандық боксшы Әли Ахмедов (12-0, 9 КО) пен қарсыласы мексикалық боксшы Хавьер Гомес (17-14, 11 КО) NABF Junior белбеуі үшін өтетін жекпе-жек алдында салмақ өлшеу рәсімінен өтті.
Жекпе-жек ертең, 12-ші қазан күні Коста-Месадағы (Калифорния штаты, АҚШ) «The Hangar» аренасында өтетін бокс кешінде өтеді.
Айта кетейік, Әли Ахмедов «GGG Promotions» промоутерлік компаниясының боксшысы. Ол Big Bear-да Геннадий Головкинмен бірге бапкер Абель Санчестің қол астында жаттығады.
Ахмедов соңғы жекпе-жегін 8-ші тамыз күні Голливудта (Калифорния штаты, АҚШ) орналасқан «Авалон» аренасында өткен «Hollywood Fight Nights 2» бокс кешінде өткізіп, қарсыласы жергілікті боксшы 33 жастағы Хорхе Эскалантені (9-1-1, 6 КО) алты раундқа жоспарланған кездесудің төртінші раундта нокаутпен жеңген болатын.